Ginkumpirmar sang bise alkalde sang banwa sang Moises Padilla, Negros Occidental nga nakadangat na sa suba sa banwa ang lahar nagikan sa Bulkan Kanlaon.
Sa interview sang Bombo Radyo Bacolod kay Moises Padilla Municipal Vice Mayor Adrian Villaflor, iya ginpahayag nga nakalab-ot na sa suba sang Intiguiawan nga makita sa boundary sang Barangay Guinpana-an kag Magallon Cadre sa nasambit nga banwa ang lahar.
Suno kay Villaflor, pila na kaadlaw ang nag-ulan ulan gani ang mga higko sa Bulkan Kanlaon matapos ini maglupok sang Lunes sang gab-i ang gin-anod kaupod ang abo.
Suno diri, bangud sa lahar wala na sang nabuhi nga mga isda kag iban pa nga nagakabuhi sa nasambit nga suba.
Kalabanan sa mga apektado amo ang mga residente sang Barangay nga malapit sa suba bangud diri sila nagapamukot bilang isa man sa ila palangabuhian.
Suno sa bise alkalde, diutay lang man ang lahar nga makita sa banwa apang bangud sa padayon nga pag-ulan nagadamo man ini bangud gina-anod ini.
Kalakip sa mga nagkalamatay amo ang tilapia, janitor kag iban pa kag ginalantaw nga asupre nga yara sa lahar ang gintunaan sang kamatayon sang mga ini.
Apang gin-athag man sang bise alkalde nga wala man gid sila naapektuhan sang lahar.
Suno kay Villaflor ang mga residente ang gina-abisuhan na ilabi ang nagapuyo sa higad sang suba nga mag-aligmat kag mag-evacuate na kun magdamo ang lahar nga nag-ilig sa suba.
