Arestado ang isa ka 29-anyos nga lalaki sa buybust operations nga ginpatigayon sang Murcia Municipal Police Station sa Sitio Beri, Barangay Salvacion, Murcia, Negros Occidental sang Biyernes.
Sa interview sang Bombo Radyo kay Police Lt. John Paul Tabujara, hepe sang Murcia Municipal Police Station, nalakip na sa nauna nga buybust operations ang suspetsado nga si Aldrin Gregorio, 29 anyos, street level individual kag residente sang Brgy. Salvacion sa nasambitan nga banwa apang sadto, nakapalagyo ini.
Sang Biyernes, natigayon ini nga naaresto kag nakuhaan sang sang 0.3 grams sang suspected shabu nga may DDB value nga P2,040.
Dugang man nga nakuha sa iya posession ang duha ka sachet sang suspected shabu; duha ka disposable lighters kag P200 nga buybust money.
Sa karun, nakahunong si Gregorio sa Murcia Municipal Police Station kag natalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
