May mga tawo nga mahuyugon magbisikleta.
Kaangay sang isa ka lalaki gikan sa Hungary nga nakakuha sang bag-o nga Guinness World Record matapos magbisita sa pito ka pungsod samtang nagabisikleta kag sa sulod lamang sang 24 oras.
Ginkilala ang lalaki kay David Kovari.
Suno kay Kovari, antes niya ginlibot ang pila ka mga lugar, ginplanuhan man sini ang routa nga iya pagaagyan sa sulod sang isa ka semana.
Sa iya pagbyahe gamit ang bisikleta, nabisitahan niya ang pito ka mga lugar kag ini ang ginlakipan sang Poland, Czech Republic, Slovakia, Austria, Hungary, Slovenia kag Croatia.
Sa iya pagbyahe, ginsiguro man sini nga indi makaagi sa ma-traffic nga lugar agud nga indi ini siya ma-delay kag makaabot gilayon sa lugar nga iya gina-target.
Wala man ini siya nagalabay sang mga matag-as nga dalan agud nga indi siya madasig nga hapuon kag kapuyon.
Si Kovari ang ikaduha kag pinakabag-o nga nakaangkon sang Guinness record matapos nga nabisitahan sa sulod sang 24 oras ang mga pila ka mga lugar.
Ang nauna nga naka-record amo ang German cyclist nga si Michael Moll nga nakabisita man sa anom ka mga pungsod.
