Aminado ang pamilya sang 28 anyos nga lalaki nga gina-alegar naglumpat sa taytay sa banwa sang Candoni, Negros Occidental nga indi ini maistorya sang maayo antes ini ginapahayag nagsuicide.
Sa interview sang Bombo Radyo Bacolod kay Police Major Richard Fajarito, hepe sang Candoni Municipal Police Station, ang biktima ang ginkilala kay Lovel Libo-on, 28 anyos kag residente sang Purok Santan, Brgy. East, Candoni, Negros Occidental.
Suno kay Fajarito, ginpahayag man sang pamilya sang biktima nga humalin sang nag-abot ini nagikan sa Manila, indi na ini maistorya pa kag indi na mahambalan.
Indi man ini vocal kag wala naman ini nagapamati kun laygayan sang mga ginikanan sini bangud masami na lamang ini nagainom kag nagama-oy.
Una nga nakit an sang mga residente kag ginaalegar nga paryente sang biktima ang ini ang nagauyat sa railings sang taytay kag may mga panagupnop na ang mga nakakita nga malumpat na ini kag bangud sa kadulom sang lugar, wala nila nakilal an nga si Lovel ini.
Wala man ginsapak sang witness ang nakita sini apisar nga may nabatian na sila nga naglagbong.
Nakibot na lamang sila pagka-aga nga may nasapwan nga bangkay sa idalum sang taytay.
Suicide ang ginalantaw nga anggulo sang mga kapulisan sa kamatayon sang biktima.
