Nasapwan nga wala na sang kabuhi ang isa ka lalaki sa sulod sang truck sa boundary sang Barangay Yubo kag Barangay Haguimit sa La Carlota City, Negros Occidental.
Ang biktima ang nasapwan alas-7:55 kaina sang aga kun sa diin ang ulo sang truck ang naga-atubang sa Barangay Yubo.
Sa interview sang Bombo Radyo Bacolod kay Police Lt. Col. Lymel John Pasquin, hepe sang La Carlota Police Station, ang flat bed truck ang masami ginakargahan sang mga construction materials, kag ini ang wala sang unod nga nagapark sa kilid sang dalan.
Ginreport sang mga residente sa kapulisan nga may-ara sang tawo sa sulod kag kaangay nga wala na sang kabuhi.
Naabtan sang kapulisan ang biktima, nga wala pa sang identity sa tunga-tunga sang driver kag passenger seat.
Sa inisyal, ini ang may igo sang bala sa ulo kag may narecover man nga tatlo ka empty shell sang cal. 45 sa area.
Magluwas diri, may nakuha man nga isa ka gamay nga sachet sang suspected shabu, toother kag iban pa nga drug paraphernalia.
Suno kay Pasquin, indi pa nila matumod kun ang biktima amo ang driver ukon pahinante sang truck, kag sa karun nagalaom ini nga may maggwa nga witness nga makapaathag sang krimen.
Ang truck ang may plate number nga CAZ8592.
