Padayon nga nagapabulong sa ospital ang isa ka anay priso matapos matiruhan bangud gina-alegar nga nagbato sa katapo sang kapulisan sang Bacolod City Police Station 2 sa Purok Balinday, Barangay 2, kahapon sang aga.
Ginkilala ang napilasan kay Alyas Chong, 27 anyos kag residente sa nasambit nga lugar.
Suno kay Police Captain Genus David, Deputy Chief sang Bacolod Police Station 2, nakabaton sang report ang estasyon angot sa isa ka lalaki nga may bitbit sang armas-luthang nga caliber 45 pistol sa kilid sang dalan.
Sa pagpadulong sang kapulisan sa lugar, gilayon nga nagdalagan si Chong pasulod sa footwalk kun sa diin ginlagas sang mga otoridad.
Una nga nagpalupok si Chong kun sa diin nagbalos man ang police bangud sini nakaagom sang pilas sa kamot kag abaga si Chong.
Suno kay David, sa inisyal nga impormasyon, anay preso si Chong kag pila lamang ka semana nga nakagwa sa prisuhan.
Samtang si alyas Chong man ang ginatudlo nga suspect sa shooting incident sa Barangay 3 kun sa diin duha ang pilason matapos ang isa gintiro sini kag ang 53 anyos nga babayi ang nasalabat lamang sang bala.
Ginkumpirmar naman sang katapo sang Explosive Ordnance Division and Canine Unit sang Bacolod City Police Office nga may nakuha sila nga granada sa balay ni Alyas Chong kag ini ang nakatungtong lamang sa bangko.
Sa interview sang Bombo Radyo Bacolod kay Police Staff Sergeant Edsel Abong, may yara sila sang narecover nga hand grenade.
Suno kay Abong tuman ka delikado ang granada sa tion nga makakas ang primary pin.
Ang tag-iya sang granada ang mangatubang sang kaso nga paglapas sa RA10591ukon Comprehensive Firearms and Ammunition Regulation Act kag ini ang non-bailable.
