BACOLOD CITY — Nakasuhan na ang 23-anyos nga lalaki nga naglabo sa iya mga himata sa Sitio Kambugnay, Barangay Cabacungan, banwa sang La Castellana nga nagresulta sa kamatayon sang tatlo ka mga persona kag ginkapilas sang duha ka iban pa.
Santo sa kumpirmasyon ni Police Chief Inspector Irma Teoxon, hepe sang La Castellana Municipal Police Station, ginpasaka sang Martes sang aga ang kaso nga multiple murder batok sa suspetsado nga si Richard Solis Paquerao.
Igapalagas naman pinaagi sa regular filing ang kaso nga frustrated murder bangud yara pa sa ospital ang mga nagkalapilasan kag wala pa nakuhaan sang affidavit.
Nahibaluan nga patay sa insidente ang pakaisa ni Paquerao nga si Luis Solis kag iya mga bata nga Lady Eloisa, 6-anyos kag Marcelino, 13-anyos samtang pilason naman ang iloy nga si Jennifer Carapayco kag 13-anyos nga si Lawrence Andrew.
Una naman nga gin-ako ni Paquerao nga away sa duta ang ginhalinan sang away nila ni Solis nga nagdangat sa pagkomiter sini sang krimen sang Domingo sang aga.
