Usisaon pa kag kilalahon ang persona nga nakuhaan sang video nga nagahaboy sang basura sa sidewalk sang Barangay Villamonte, nga mahimo mangatubang sang kaso.
Sa interview sang Bombo Radyo Bacolod kay Bacolod City Legal Officer Atty Carol Joseph Chiu, ang lalaki ang mahimo makasohan sa paglapas sa City Ordinance 531 ukon Anti-Littering Act kag Republic Act 9003.
Suno sa abogado, kinahanglan nga makuha ang petsa kun san-o natabo ang yara sa video, ang mismo nga area kun diin natabo kag ang oras sang ini ang nakit-an.
Nagapati si Chiu nga ang lalaki nga nagadrive sang e-bike ang nagapuyo malapit lamang sa area bangod sa ini ang nakatopless kag nakasab-it sang bayo sa abaga, nakashorts kag nakatsinelas.
Kun indi residente sang Barangay Villamonte, ginalantaw sini nga sa kaingod nga Barangay 27, 26 kag 22.
Nagapati si Chiu nga kilala lamang sang mga Barangay officials ang lalaki.
Aminado ini nga may mga e-bike drivers nga ginasuhulan sang mga residente sa paghaboy sang ila nga mga basura.
Nagapati ini nga bangod sa lapses sang IPM CDC sa pagpanghakot sang basura rasun kun ngaa nagabayad na lamang ang mga pumuluyo.
Samtang pahanumdom sini nga may mga ginpahamtang naman nga mga dalagko nga garbage bin sa tagsa ka Barangay nga mahabuyan sang basura, agud diri na lamang magahakot ang mga garbage collectors partikular na sa mga suludlon nga Barangay.
