Patay ang isa ka lalaki matapos nga gintiro sa Purok Katilingban, Barangay Banago ciudad sang Bacolod kahapon sang aga.
Ginkilala ang biktima kay Stephen Grajo, 25-anyos sang nasambit nga lugar samtang ang suspek naman amo si Arvin Sayson, 35-anyos sang Purok Kawayan sang amo nga nga barangay.
Sa interview sang Bombo Radyo Bacolod kay Police Senior Master Sgt. Donnie Garcia, imbestigador sang Bacolod Police Station 3, ginpahayag sini nga nagalakat sa foot-walk si Grajo sang ginsugata ini ni Sayson kag gintio gamit ang homemade shotgun.
Gilayon nga gindala sa Corazon Locsin Montelibano Memorial Regional Hospital ang biktima apang gindeklarar nga dead on arrival.
Nakaangkon si Grajo sang pilas tuga sang pagpangluthang sa iya likod nga naglapos sa iya dughan nga nangin tunaan sang iya kamatayon.
Ginapahayag nga babayi ang nangin rason sa pagpatay ni Sayson sa biktima.
Suno kay Garcia nagapadayon pa sa karon ang manhunt operation batok sa suspetsado bangud nakapalagyo ini matapos ang insidente.
