Para sa iban ang pagpangindi sa mga butang ang mahapos lang, apang may yara man sang tawo nga nabudlayan magpangindi ilabi na sa pamilya ukon paryente.
Isa ka 32 anyos nga Indian nga lalaki ang hungod nga gin-utod ang iya apat ka tudlo sa nawala nga kamot agud nga indi na magtrabaho pa bilang computer operator sa kumpanya sang iya paryente.
Nagpalapit sa police station si Mayur Tarapara kag nagreport nga nadula ang iya apat ka tudlo.
Suno diri, nagasakay ini sa motorsiklo padulong sa balay sang iya abyan sang naglingin ang iya ulo kag nalipongan sa kilid sang dalan.
Pagbugtaw sini, wala na ang iya mga tudlo.
Apang nagpadayon sa pag-imbestigar ang kapulisan kag nakita sa CCTV footage nga nagpark sang motor si Mayur kag naglakat ini kag nagbalik nga may pilas na ang kamot.
Ginpamangkot ini liwat sang pulis kag nag-ako nga nagbakal ini sang patalum para utdon ang iya mga tudlo kag ginsulod ang patalum kag mga tudlo sa isa ka bag ginhaboy.
Suno kay Mayur, indi na sini gusto pa magtrabaho sa kumpanya sang iya paryente apang nahuya ini mag-resign amo nga gin-utod niiya na lang ang iya tudlo para nga indi na magtrabaho.
