Nagdangat sa kapin sa P1 billion ang nakolekta sang Land Transportation Office gikan sa mga multa kag penalidad nga ginabayaran sang mga traffic violators sa sulod sang anum ka bulan subong nga tuig 2024.
Sa datos sang LTO, 330,073 ka mga motorista ang nadakpan nationwide humalin sang Enero 1 tubtob sang Hunyo 30.
Iban sa mga nadakpan ang wala pa nakabayad sang penalty apang P986.5 million na ang nakolekta sang LTO.
Suno kay LTO Chief, Assistant Secretary Atty. Vigor D. Mendoza II, ini ang resulta sang husto nga pagtrabaho sang law enforcers nga nagdedikar sa pag-siguro sang road safety.
Dugang pa sini, ginalauman ang pagtaas pa gid sang natipon nga revenue kun ma-settle na sang tanan nga nadakpan ang ila penalty.
Amo nga nagapanawagan ini nga mas maayo nga mabayaran on time ang ila nga penalty agud nga indi na magdako pa gid ang ila bayaran.
Magluwas sa mga multa kag penalidad, iban nga revenue sang LTO ang naggikan sa pag-charge sa mga motorista kag driver’s license transactions.
