BACOLOD CITY – Nagkinagula ang mga pumuluyo sang Barangay Vista Alegre matapos nga may nakit-an nga lapida nga may mga bulak kag natunaw na nga mga kandila sa palibot sini.
Kaina sang hapon, nagtinipon ang mga pumuluyo sa lugar sa diin ginapatihan naghalin ang malain nga bahu sang nagliligad nga inadlaw kag sa tupad sang kahoy nga gmelina, nakit-an ang lapida nga may tatlo ka puti nga rosas kag naupod nga kandila.
Isa sa mga saksi amo ang apa nga si Laura Ong nga natyempuhan nagapangahoy sa nasambit nga lugar kahapon.
Suno kay Nelly Danilla, nagatindog nga interpreter ni Ong, nakakita ini sang tatlo ka mga tawo nga may tabon sa nawong kag nagasuksok sang jacket.
Nagkutkot ang mga ini sang buho kag kaangay nga may ginlubong antes gintubsukan sang kahoy nga krus.
Apang ginkahoy ni Ong ang krus kag ginsaylo ang lapida nga nahamtang indi man malayo sa lugar.
Ang lapida may nasulat nga ngalan ni Rosseyll Angelo V. Palada, petsa nga July 29, 2017 kag mga tinaga nga, “For the love from us you are always be remembered. We love you, Dad and Mom”.
Samtang, padayon nga ginausisa sang kapulisan kag opisyales sang Barangay Vista Alegre ang lugar sa diin nakit-an ang lapida.
Suno kay Punong Barangay Jose Leandro de Leon, sang nagliligad nga inadlaw may malain nga bahu nga nagikan sa amo nga lugar apang malayo ini sa ginahamtangan sang lapida.
Naistorya sini ang pamilya nga ginpasuni nagbutang sang amo nga lapida, napatay ang ila anak sa Manila sang tinalikdan nga binulan apang bangud ang amay ang yari sa ciudad sang Bacolod, nagbutang ini sang lapida para sa “remembrance”.
Indi naman kumbinsido diri si De Leon rason nga ginpausisa sini ang lugar sa posibilidad nga may bangkay nga ginlubong diri kag nagsala lamang sa ginpahamtangan sang lapida.
Mangin ang tag-iya sang duta ang nagreklamo bangud sa ginhimo sang amo nga pamilya.
Suno kay De Leon, kun matuod nga may ginlubong sa lugar, may daku nga salabton sa kasuguan ang nagpabutang sini.
