BACOLOD CITY-Tuman ka emosyonal ang pamilya sang lima ka bulan sang lapsag nga lalaki nga naanod sa suba kadungan sang pagbaha nga nagluntad sa ciudad sang Bacolod kahapon sang hapon.
Pasado alas 6:00 kaina sang aga, nakit-an sang isa ka mangingisda ang lawas sang lapsag nga si Jake Lawrence Portogo sa baybay nga sakop sang Purok Malipayon, Barang ay 35, Bacolod City.
Ang biktima ang ginabilin sang iya mga ginikanan sa iya tiya sa Purok Malinong, Barangay Taculing kun aga bangud naga-ubra ang mga ini.
Sa interview sang Bombo Radyo Bacolod sa nagabantay sang lapsag nga si Clarissa Cañete, naguba ang ila nga balay matapos matup-an sang nawas-ag nga pader sang bodega sang bodega sang isa ka bakeshop pasado alas 4:00 sang hapon.
Bangud yara sa pangpang sang Ngalan River ang balay nanday Cañete, gilayon nga gin-anod sang makusog nga daludo sang tubig ang lapsag nga natabuan nga nagakatulog sa duyan kag wala na nasalbar sang iya mga himata.
Indi naman mabaton sang mag-asawa nga si Janel Bulak kag Lorenie Portogo ang natabo sa ila nga subang bangud papauli na kuntani ang 23-anyos nga iloy sang matabo ang trahedya samtang nagaduty naman sa fastfood chain sa San Sebastian Street ang 21-anyos nga amay.
Ginpahayag naman sang mangingisda nga nakakita sa lapsag nga yara ini sa lutakan sang ila nga masapwan.
Suno kay Jason Arellano, 46 anyos kag residente sang Purok Malipayon, Brgy. 35, ciudad sang Bacolod, tuyo sini kuntani nga manginhas apang nakit-an sini ang isa ka babayi nga nagadalagan kag nagasinggit nga may bata nga napatay.
Gilayon ini nga ginpalapitan ni Arellano kag nakit-an nga wala na sang kabuhi si Jake Lawrence kag madamo sang lutak.
Gindala nila ini sa higad sang baybay nga suno sa iya, 150 metros ang kalayuon nagikan sa nahamtangan sang lima ka bulan nga lapsag.
