Ginkakibot sang principal sang Handumanan Elementray School 2 ang pag-abot sang mga laptops kag TV nagikan sa Department of Education.
Sa interview sang Bombo Radyo kay Leo Ceralbo, sang Biyernes may truck nga nagdeliver sa ila sang lima ka laptop kag lima man ka 58 inches smart TV.
Suno diri, wala nila ginalauman ang pag-abot sang mga gadgets nga bisan ang school division office wala man nakahibalo.
Nakabaton man ang iban nga buluthuan sang mga gadgets kag iban ang ginhatagan sang napulo ka laptop kag lima ka TV.
Samtang, mas manami naman sa karun ang kalidad sang mga laptop sangsa mga laptop nga ginhatag sang nakaligad.
Wala man ini nakahibalo kun ano ang bases kun pila ang mahatag nga gadgets sa kada buluthuan apang suno kay Ceralbo, padayon ang pagpangdeliver sa karun.
Gintsekyar man sini ang prices sang mga laptops nga ginhatag kun sa diin ang kada isa ang nagabalor sang kapin sa P35,000 kag ang TV naman ang nagabalor sang kapin sa P37,000.
Apang, apisar nga ginakalipay sini ang pag-abot sang bag-o nga laptop kag TV, ginakasubo naman sini nga tuman naman ka dutay ang ginhatag.
Pahayag ni Ceralbo, nahibaluan nga dako pa ang sobra sa budget para sa procurement sang laptop kag TV gikan pa sa 2023 budget, kuntani suno diri ibakal na ang nabilin nga budget agud mahatagan ang tanan nga mga buluthuan.
Nagapati si Ceralbo nga kun mahatagan sang nagakaigo nga numero sang gadgets ang kada buluthuan, dako ang bulig sini para sa mga manunudlo kag mga estudyante agud nga mapataas ang kalidad sang edukasyon sa Pilipinas.
