Nataban ang P70,000 nga collection sang isa ka lending collector matapos nga siya ang ginhold-up sa Sitio Alamay, Barangay Tabun-ac, Toboso, Negros Occidental kahapon kapin ala-1:10 sang hapon.
Sa interview sang Bombo Radyo Bacolod kay Police Captain Rene Boy Eduardo, hepe sang Toboso Municipal Police Station, ang biktima ang isa ka 35 anyos nga lending collector, nga residente sa Prk Sampaguita, Brgy Poblacion, Toboso.
Ginalantaw nga natun-an na sang mga suspect ang hulag sang biktima bangod nahibaluan nila kun sa diin magalabay kag kun ano oras nagalabay nga may-ara na sang koleksyon.
Samtang nagamaneho sang motorsiklo sa Barangay road, hinali nga ginbalabahan sang duha ka suspect ang lending collector, gintayaan sang kutsilyo kag gintaban ang kapin P70,000 nga koleksyon.
Ang duha ka suspect ang magka-angkasanay naman sa itom nga Bajaj nga motorsiklo sang magpalagyo, kag wala man nila ginsakit ang biktima.
Suno kay Eduardo, tinuig naman nga nagapanukot sa lugar ang biktima.
Samtang natabo ang insidente sa nabukid na nga bahin sang banwa sang Toboso.
Panugyan ni Eduardo sa mga lending collectors nga indi magsulod sa mga nabukid ukon suludlon nga lugar nga naga-isahanon agud malikawan ang kaangay nga insidente.
