Ginakasubo ni Leo Rey Yanson (LRY) ang nagakatabo nga indi pag-hangpanay nila nga mag-ululutod bangud lang sa multi-billion transportation business sang ila pamilya.
Sa ginpatigayon nga pagpamulong-pulong sang kampo ni LRY sa resthouse nila sa Hacienda Bubog, Talisay City kahapon, nagalaum siya nga makaangkon pa sang kalinong kag paglangga-anay ang ila pamilya.
Apisar pa sa mga nagakatabo subong sa ila, naga-hingyo ini sa gihapon sa iya mga utod nga sanday Roy Yanson, Ma. Lourdes Celina Yanson-Lopez, Emily Yanson, kag Ricardo Yanson Jr. nga kun mahimo ila man kuntani bisitahon kag kumustahon ang ila iloy nga si Olivia Yanson.
Suno kay Leo Rey, apisar anu pa ang matabo, ila ini sa gihapon nga iloy nga amo ang nagtatap sa ila humalin sang bata pa lang tubtob sa kun ano na sila sa subong.
Ginpahayag man ni LRY nga wala na ini sang pakialam kun kaksan siya sang pwesto, ang importante lang suno sa iya nga makaangkon sila sang kahilwayan, kalinong kag wala sang pag-dinumtanay sang iya mga utod nga nag-pakakas sa iya bilang presidente sang Yanson Group of Bus Companies.
Related | Ousted president sang Yanson Group of Bus Companies, suportado sang mga empleyado
Nahibaluan nga ang kompaniya ang gintukod sang nagtaliwan nga padre de pamilya nga si Ricardo Yanson Sr. sadtong 1968 kag nag-umpisa lang sa isa ka jeepney unit nga may rota nga halin sa syudad sang Bacolod padulong sa banwa sang Valladolid kag La Carlota City nga amo sa karun ang ginatawag nga ValLaCar Transit.
