BACOLOD CITY — Gilayon nga ginpaalerto sang alkalde sang banwa sang La Castellana ang tanan nila nga disaster volunteers matapos nga ginpasaka sa alert level 2 ang bulkan Kanlaon kahapon.
Suno kay Mayor Rhumayla Mangilimutan gilayon man sila nga nagpatigayon sang ricorida sa mga barangay nga yara sa ubos sang bulkan.
Apang suno sa alkalde bisan yara sa alert level 2 ang Kanlaon wala nagapanic ang mga tawo nga malapit sa bulkan bangud nga naanad na ang mga ini.
Apang sa gihapon preparado gid ang banwa sa posibilidad sang paglupok sang Bulkan Kanlaon.
Suno kay Mayor Mangilimutan may maayo nga radio communication ang naibabaw nga mga barangay sa town proper kag kaduha sa isa ka tuig nagapatigayon sang peer pressure training ang Disaster Risk Reduction Management Office (DRRMO) partikular tuhoy sa volcanic eruptions.
Kun maglupok gid man ang bulkan preparado na ang evacuation centers sang banwa bangud nga may yari ini sang Memorandum of Understanding sa tanan nga eskwelahan publiko man ukon pribado nga himuon nga evecaution centers ang ila nga covered court.
Pananglitan maglupok gid man ang Mount Kanlaon suno kay Mayor Mangilimutan maapektuhan ang mga barangay sang Sag-ang, Mansalanao, Cabagnaan, Puso, Biak na Bato, Masulog, Manghanoy kag Camandag.
Gilayon man nga nagpatigayon sang information dissemination kag meeting ang Disaster Risk Reduction Management Office (DRRMO) sang ciudad sang Bago matapos nga gin pasaka sa alert level 2 ang status sang Bulkan Kanlaon kahapon.
Suno kay Dr. Mary Jane Ortizo, DRRMO action officer sang Bago, ginpahibalo gilayon ang mga punong barangay sang Brgy. Mailum kag Ilihan sa development sa bulkan bangud nga kun maglupok gid man ang Mount Kanlaon sila ang gilayon nga maapektuhan.
Nagsapol man ang Pre-Disaster Core Group sang City Disaster Risk Reduction and Management Council agud nga maghimo sang action plan nga I-presentar sa meeting subong nga adlaw.
May natumod na nga evacuation centers kag pick-up points sang mga pumuluyo pananglitan maglupok ang bulkan.
Suno kay Dr. Ortizo indi lang ang Mailum kag Ilihan ang ginapa-preparar kundi ang tanan nga barangay sang Bago bangud nga kun maglupok gid man ang Bulkan Kanlaon sila ang magabulig sa mga apektado nga barangay.
