Ginahulat pa sang mga otoridad nga makuhaan sang statement ang live-in partner sang 29-anyos nga lalaki nga ginluthang patay sa Purok Sigay, Barangay 2 ciudad sang Bacolod kahapon sang aga.
Madumduman nga ginkilala ang napatay nga si Rhanz Moore Banias, 29-anyos kag residente sang Purok Maabi-abihon, Barangay Banago samtang pilason naman si Mary Liza Pahamutang, 36-anyos sang Purok Sigay, Barangay 2.
Nahibaluan nga nagakatulog ang mga biktima sang hinalai lang nga ginsulod sila sang wala makilal-an nga suspetsado nga niwangon nga nagasuksok sang bike helmet, naka-facemask, blue sweat shirt kag naka-dilargo kag ginpangluthang.
Nakaangkon sang isa ka igo sang bala sa natuo nga kamot kag duha ka igo sang bala sa likod sang iya ulo si Banias samtang isa naman ka igo sang bala sa nawala nga mata kag isa ka igo sang bala sa likod ang naagom ni Pahamutang.
Ginhangagaw ang duha dala sa ospital apang gindeklarar nga dead on arrival si Banias samtang padayon naman nga ginabulong si Pahamutang.
Sa interview sang Bombo Radyo kay BCPO Spokesperson Police Lt. Liberty Indiape, ginpahayag sini nga nagapadayon pa sa pagbulong si Pahamutang kag luwas man ini sa katalagman.
Suno sa iya, wala pa siya makuhaan kahapon sang statement sang Bacolod Police Station 2 bangud alang-alang ang sitwasyon apang ila ini kuhaan sang statement tuhoy sa insidente.
Sa karun padayon pa nga ginahibalo sang kapulisan ang motibo sang krimen.
