Ginalantaw nga person of interest sang mga kapulisan sa Negros Oriental ang ka live-in sang American marine scientist nga gintiro patay sa sulod sang ila balay sa Sibulan, Negros Oriental sang Domingo, Hulyo 12.
Madumduman ang biktima amo si Dr. Kent Carpenter, kilala nga marine scientist nga nagapatigayon sang mga pagtuon angot sa fish biodiversity, nagserbe adjunct professor kag researcher sa Siliman University kag siya man ang biological sciences professor sa Old Dominion University sa Norfolk, Virginia, humalin sang 1996.
Sa interview sang Bombo Radyo Bacolod kay Police Captain Stephen Polinar, spokesperson sang Negros Oriental Police Provincial Office, ginakabig nga person of interest ang live-in partner sang biktima.
Suno kay Polinar, wala ini nagakahulugan nga suspetsado kundi may yara sang vital information nga makabulig sa pagsolbar sa nagluntad nga krimen.
Una na nga ginalantaw nga motibo sa krimen ang pagpangawat.
Sa karun nagapadayon ang mga otoridad sa ila ginapatigayon nga imbestigasyon agud nga matumod ang motibo kag suspetsado sa krimen.
