Ginkumpirmar sang alkalde sang La Castellana, Negros Occidental nga nag-usmod ang isa ka bahin sang Calapnagan Bridge sa Barangay Biaknabato sang Setembre 15.
Sa interview kay La Castellana Mayor Añejo Nicor nga ini ang kasunod sang mabaskog nga ulan sang tinalikdan nga gab-i kag pag-ilig sang lahar ukon mud flow.
Paathag ni Nicor, magamay ang buho sa idalom sang taytay nga mapaanggid sa taytay sa Ibid Creek sa Sitio Tamburong sa amo man nga barangay.
Samtang, nagapabilin sa evacuation center ang mga nag-evacuate kasunod sang muddy stream flow bangud sa madamol nga pag-ulan sa tamburong creek sa Barangay Biaknabato.
Pahayag sang alkalde, yara sa old Barangay hall ang 27 ka mga pamilya kag 96 ka indibidwal nga apektado sang lahar flow.
Suno kay Nicor ang mga ini ang nadul-ungan naman sang pagkaon kag iban pa nga kinahanglanon.
Ginpahayag man sang alcalde nga wala sang casualty bangud ang mga residente nga ara nahamtang malapit sa suba ang naga-evacuate na nga daan ilabi na kun makita nga delikado ang sitwasyon.
