Kadungan sang pagtakop sang Heritage Month subong nga Mayo, nagapati ang Provincial Tourism Office nga ini man ang nagakaigo nga panahon agud nga ilunsyar ang Negros Cultural Hub nga nahamtang man lang sa palibot sang Kapitolyo sang probinsya.
Sa interview sang Bombo Radyo kay Provincial Tourism Officer Jennylind Cordero, madamo ang attractions sa Cultural Hub nga nagsugod mismo sa Kapitolyo kun sa diin nahamtang ang Paghimud-os ukon Kilometer Zero nga nagapakita sang paghimud-os sang mga Negrosanon.
Yara man ang duha ka karabaw nga himo sang foreign architect kag ginhimo ni Felix Garzon sang Murcia kag may yara man sang war memorial sa Capitol Lagoon.
Interesante man ang Lagoon suno kay Cordero kun sa diin sarang nga maka-jog kag aerobics ang mga pumuluyo.
Tinutuyo sang aktibidad kaina suno sa tourism officer nga mahibaluan sang mga tawo nga bisan indi makatravel subong nga may COVID pandemic, may yara sang cultural hub nga sarang mabisitahan.
Sa tion nga magsugod na gid ang operasyon sang Negros Food Terminal Market, makabakal na diri sang seafoods halin sa nagkalain-lain nga bahin sang Negros Occidental kag may yara man sang dry goods.
Yara man ang Negros Residences nga sarang makatinir sa barato lang nga presyo.
Nagakaigo ini nga tinion nga buksan ang Cultural Hub suno kay Cordero agud nga maapresyar sang mga pumuluyo ang heritage sang kaugalingon nga probinsya ilabi na nga madamo na sa karon ang domestic tourists.
