Ginabanta nga magadangat sa masobra P4.1 billion ang posible nga madula sa income sang gobyerno kasunod sa pagsuspender sang excise tax sa kerosene kag liquefied petroleum gas (LPG) sa sulod sang tatlo ka bula bangud sa nagapadayon nga kinagamo sa Middle East, suno sa Department of Finance (DOF) official kahapon sang Martes.
Pahayag ni Finance Undersecretary Karlo Fermin Adriano sa isa ka press briefing sa Malacañang, kun i-suspende pa gid ang diesel kag gasolina maga-labot sa masobra P43.6 billion ang madula sa income sang gobyerno sa sulod sang tatlo kabulan.
Suno kay Adriano, may ara man sang dugang nga koleksyon nagikan sa value-added tax (VAT) nga magalab-ot sa P13 tubtob P14 billion bangud sa mas mataas nga presyo sang langis.
Paathag sini, kun ikonsiderar ang full suspension sang diesel kag gasolina kag kun ang VAT collection ang yara sa P13 tubtob P14 billion, ang negative revenue loss ang yara sa P30 billion.
Madumduman nga sang Lunes, gin-nanunsyo ni President Ferdinand “Bongbong” Marcos Jr. ang pagsuspinder sang koleksyon sang excise tax sa LPG kag kerosene sa tunga sang mataas nga presyo sang langis sa pungsod.
Sang Marso 25, ginpirmahan ni Marcos ang Republic Act 12316 nga magahatag sa iya sang emergency powers agud suspendihon ukon buhinan ang excise tax sa mga produktong petrolyo.
