Hambal nila ang tawo ang mahimo mag-move on apang wala nagakalipat magluwas lang kun magpakuno-kuno nga naamnesia.
Apang paano kun ang imo nga ex ukon anay kahagugma nga naghatag sa imo sang indi maayo nga eksperyensya ang imo ginpakaslan bangud ikaw ang matuod-tuod nga naamnesia?.
Kaangay natabo sa mag-asawa didto sa Utah, USA nga sanday Jenna kag Mitchell Brotherson nga may indi kinaandan nga love story.
Malawig man ang relasyon sang duha, apang sadtong Pebrero 2020, nag-agree sila nga mag-break kag indi na lang pagpadayunon ang ila pag-updanay.
Bangud sini naghilibion si Jenna samtang nagpauli.
Pagkaaga naman, naglakat naman si Mitchell kag nag-ski.
Samtang naga-enjoy sa skiing, gintinguhaan sini nga mag-flip, apang sala ang iya landing, nag-una gid ang ulo, sini nga gintunaan sang bad concussion.
Ang concussion amo ang mild traumatic brain injury nga nagaapekto sa pag-function sang utok kag bangud sini nagalingin ang ulo sang pasyente kag may mga hitabo nga indi niya madumduman ukon ang ginatawag nga amnesia.
Suno pa sa panaysayon sang babayi, matapos ang aksidente, nakabaton siya sang text message kag tawag halin kay Mitchell nga nagapasugat ini sa ospital.
Bangud sini, naglibog man ang ulo ni Jenna kag ginkatingala man sini nga pagkadason nga adlaw, nagpadayon sa pagchat si Mitchell kag ginahagad ini nga magdate sila.
Tubtob nga spring break, adlaw-adlaw siya nga ginapangita ni Mitchell kag didto nga nakita liwat ni Jenna kun ano ini ka-thoughtful kag na-realize niya nga palangga pa niya ini.
Sang siya na ang nagprangka nga gusto sini nga magbalikanay sila, nakibot man si Mitchell nga break na gali sila.
Didto man naathagan nga ang ila breakup ang kabahin sang mga hitabo nga nalipatan sang lalaki bangud sa iya naangkon nga brain injury.
Nagbalikay sila kag Agusto sang amo man nga tuig, nag-propose si Mitchell kay Jenah sa Salt Lake City sa Utah kun sa diin sang Setyembre nagpakasal sila sa amo man nga state.
Subong apat na katuig nga kasal ang duha kag may anak na ang mga ini.
