BACOLOD CITY – Kritikal ang mag-iloy matapos ginluthang sang makatatlo ka beses sang ila kaingod sa Purok BM, Barangay Taculing, ciudad sang Bacolod, las-7:00 kaina sang aga.
Gilayon gindala sa Bacolod Adventist Medical Center (BAMC) ang mga biktima nga sanday Ronela Calencia, 48-anyos kag bata sini nga si Ranwil, 21-anyos, matapos ginluthang sang ila kaingod nga si Alex Javier, 53-anyos.
Ginpahayag nga nagapanilhig ang kaingod sang mga biktima kag suspetsado nga si Rachelle Tilibrico sang hinali nga nagsiling ang asawa ni Javier nga si Ruth nga kuhaon ang camera sini bangud naguwa na ang gin-alegar mga tsismosa.
Ginsakyan ni Rachelle ang pagpanggarit-garit sa iya ni Alex paagi sa pagsaot-saot apang sang ulihi, nangutos ang lalaki kag nagbuya sang makahang nga mga tinaga sa babayi.
Gintinguhaan nga matapi ni Rachelle ang cellphone ni Javier apang ginsumbag siya sini nga nag-igu sa iya nga dulunggan.
Nagresponder ang bana ni Rachelle apang sang ginsita sini ang suspetsado, nagkadlaw lamang si Javier kag ginhangkat ang lalaki nga magpalapit.
Paumuran na lamang kuntani sang mga ini ang hitabo apang naguwa ang asawa kag kabataan sang suspetsado kun sa diin ila pa ginsulsulan ang ila amay nga tiruhon ang mga ini gamit ang iya nga 38 calibre nga armas.
Bangud nga indi sini malab-ot si Rachelle, iya na lamang gintiro sang makaduha ka beses ang iloy nga Calencia nga sadto nagatindog sa pwertahan sang ila balay.
Ginsita ini sang bata ni Calencia nga Ranwil apang mangin siya ang gintiro man ni Javier antes ini nagpalagyo.
Ginpasuni ang footwalk kag ang kalog nga ginpasirad-an sang mga Javier, nga nagatuga sang pagbaha sa lugar tagsa mag-ulan, ang gin-ugatan sang kinagubot sa tunga nila sang ila mga kaingod.
Nagpasugat naman sa pulis ang pamilya Javier agud luwas nga makabiya sa ila nga lugar.
