Patay ang magulang samtang, pilason naman ang manghod sini matapos ginpangbuno sang isa ka Barangay Tanod sa Hacienda Carmenchika, Brgy. DSB sa banwa sang Pontevedra las-12:15 kaina sang tungang gab-i.
Ginkilala ang napatay kay Renan Tagle, 24-anyos kag ang utod sini nga isa ka menor de edad nga padayon pa nga ginabulong sa ospital.
Samtang nagsurrender naman sa kapitan sang nahinambitan nga barangay ang suspetsado nga si Simeon Warte, 28-anyos, kasado kag residente sang 2nd street, Brgy.DSB, Pontevedra matapos sini nga nakomiter ang krimen.
Suno kay Police Lieutenant. Edgar Salde, deputy station commander sang Pontevedra Municipal Police Station, may yara sang ginpatigayon nga alumni homecoming ang DSB Elementary School, kag isa si Warte sa mga tanod nga on-duty, sang ginpalapitan ini sang isa ka maestra sang amo nga eskwelahan nga may yara sang nagapanghaboy sang botelya sa gwa sang amo nga buluthuan.
Sang iya ini nga gintsekyar, hinali lang siya gin-pulihan sang grupo sang mga kalalakin-an kag ginsumbag ini nga nag-igo sa iya nga guya.
Ginhanaan man siya nga bun-on sang isa apang natigayon sini nga maagaw ang kutsilyo nga amo ang iya gingamit sa pagbuno kay Tagle nga nakaangkon sang isa ka igo sa iya liog nga amo ang rason sang iya kamatayon.
Samtang, sang nakita sang manghod sini ang natabo, nagpalapit man ini rason nga nabun-an man siya sa iya nga dughan.
Kaso nga Homicide kag frustrated Homicide ang nakatalana nga ipasaka sa suspetsado.
Date of airing: April 22, 2019
