Ginpanginwala sang maglive-in partner nga miyembro sang LGBT community nga nakuhaan sang masobra P7 million nga balor sang suspected shabu sa ciudad sang Silay kagab-i nga nagbaligya sila sang ginadumilian nga druga.
Sanday Razel Gamazan alyas Tomboy, 37 anyos kag Lennie Nava alyas Nene, 40 anyos, lunsay mga sari-sari store owner kag residente sang Barangay Pasong Tamo, Tandang Sora, Quezon City ang nabaklan sang P30,000 nga balor sang suspected shabu kag nakuhaan pa gid sang kabug-usan nga 1,050 grams sang shabu nga nagabalor sang P7, 140, 000 antes ang tungang gab-i kagab-i.
Sa interview sang Bombo Radyo kanday Gamazan kag Nava, ila ginpatpat nga Hulyo 20 sila nag-abot sa Iloilo bangud magabisita sila sa himata ni Nava sa Negros Occidental.
Sang manugsakay na ang mga ini sa roro vessel patabok sa Bacolod, ila gin-alegar nga may mga lalaki nga nagpalapit kag nagpasakay sa ila sa salakyan.
Samtang ara sa sulod sang salakyan nga nagsaka sa roro vessel, gin-alegar sang duha nga ginbutangan ang mga ini sang blindfold kag ginpahayag sang mga lalaki nga sundon kun ano ang ila ihambal bilang kabahin sang isa ka scenario.
Matapos nga makadungka sa BREDCO Port suno sa duha, madamo sila sang ginkadtuan apang nagapabilin ang ila blindfold.
Kagab-i, may gintabo ang mga ini sa isa ka waiting shed apang wala sila nakahibalo sang ngalan sang lugar.
Suno sa duha, ginpabitbit sang mga lalaki sa ila ang bag agud idaho sa ila nga tabuon sa waiting shed apang sang nadaho na ini, sila ang ginposasan kag ginpakita sa ila ang illegal substance nga ila dala.
