UKRAINE – Nagapadayon ang invasion sang Russian troops sa Ukraine kun sa diin makit-an sa sattelite images ang isa ka 40-mile-long Russian military convoy nga nagapadulong sa capital nga Kyiv kadungan sang pagpang-atake sang Russian forces sa main TV tower sang ciudad.
Samtang, ang Kharkiv, nga ikaduha nga pinakadako nga ciudad sa Ukraine, ang naigo sang intense shelling sa ikaanum nga adlaw sang invasion nga ginpangunahan ni Russian President Vladimir Putin.
Suno sa health ministry sang Ukraine, indi magnubo sa 350 ka mga sibilyan ang napatay lakip na ang 14 ka mga kabataan.
Kalabanan sa mga sibilyan nga nadulaan sang kabuhi ang napatay bangud sa mga explosive weapons kag shelling nagikan sa heavy artillery, multi-launch rocket systems, kag air strikes.
Sa interview sang Bombo Radyo kay Joy Fernandez Tolentino direkta sa Ukraine, yara sila sa karun sa ciudad sang Frankivsk nga malapit sa Kharkiv, kag batiun ang mga linupok kag mga fighter jets sa ila.
Suno kay Tolentino, nagapuyo sila sa karun sa iloy sang iya amo nga lalaki apang indi sila diri magtinir kag magasaylo sa nabukid nga bahin.
Suno sa iya, magasaylo sila sa nabukid nga bahin bangud indi mapaktan ang sitwasyon sa mga ciudad sa karun ilabi na nga malapit lamang ang Kharkiv sa Frankivsk.
Suno sa iya, indi na sarang ang mga Ukranians nga makagwa sa pungsod sa karun bangud kinahanglan nila nga magbato ilabi na sa mga lalaki.
Wala naman sila nagagwa kun adlaw bangud posible nga masal-an sila nga spy kag matiruhan.
Mas ginpili naman sang OFW nga mag-upod sa iya employer bangud wala sila padulungan nga mga Filipino kun sila lamang kag nagapati ini nga mas safe siya kaupod ang iya mga amo.
Suno diri, indi man delikado kun kaupod sini ang iya mga amo apang ila ginakahadlukan nga magbomba ang Russia sang nuclear bomb.
