Masobra tunga sa milyon ka pesos nga balor sang iligal nga druga ang nakumpiskar sang Philippine Drug Enforcement Agency (PDEA) sa raid nga ginpatigayon sa Brgy. Estefania, Bacolod City kahapon.
Ginkilala ang suspetsado kay Romel Diaz, residente sang Brgy. 2, Purok Sigay, ciudad sang Bacolod apang nagarenta sang balay sa Brgy. Estefania.
Sa interview sang Bombo Radyo kay Brgy. Kagawad Eduardo Sayson, vice chairman sang Committee on Peace and Order, may yara sang search warrant batok kay Diaz kag nag-upod ang mga opisyales sang barangay sa pag-raid sang PDEA.
Suno sa iya, ginkapkapan pa nila ang mga ini antes magsulod sa balay sang suspetsado agud masiguro nga wala sila sang dala nga illegal nga droga.
Nakuha sa paghinakop ni Diaz ang 80 ka gramo sa suspected shabu nga ginabanta nagabalor P544,000.
Nahibaluan nga nagasupply si Diaz sang shabu sa Homesite kag kun kaisa, nagakadto ang mga buyer sa iya balay.
Sa karun, yara sa kustodiya sang kapulisan ang suspetsado.
Nagapadayon man ang pagmonitor sang mga opisyales sang barangay suno kay Sayson, sa mga residente nga posible nagaduso sang illegal nga droga.
Nagpasalig man ang barangay kagawad nga nagasuporta ang mga opisyales sang Brgy. Estefania sa programa sang administrasyon batok sa illegal nga droga. Samtang,
P420,000 ang balor sang illegal nga droga nga nakumpiskar sa buybust operations nga ginpatigayon sang Bacolod City Police Office – City Drug Enforcement Unit sa Sitio Sibucao, Brgy Banago, Bacolod City kahapon.
Sa impormasyon nga nakuha sang Bombo Radyo, ginkilala ang suspetsado kay Ronaldo Bernabe, 36 anyos, residente sang Purok Tae, Sitio Sibucao, Brgy. Bago, Bacolod City kag ginakabig nga high value target; Ma. Christina Aguia, 32 anyos, residente sang Purok Paglaum, Brgy. Bato, Sagay City kag ginakabig nga street value target; Ramie Amodia alyas “Ramie Bongkoy” sang Purok Tae, Sitio Sibucao, Barangay Banago, Bacolod City.
Nakuha sa paghinakop ni Bernabe ang P1000 nga mark money; P2000 nga cash proceeds; walo ka heat sealed transparent plastic sachet sang suspected shabu; isa ka digital weighing scale; kag isa ka grey belt bag.
Samtang, isa naman ka itom nga coin pouch; isa ka unit sang cellphone; kag pito ka heat sealed transparent plastic sachet sang suspected shabu ang nakuha sa paghinakop ni Aguia.
Ang nakompiskar nga illegal nga droga ang ginabanta nagabug-at sang 35 gramo.
Sa karun, yara sa kustodiya sang kapulisan si Bernabe kag Aguia samtang at large naman si Amodia.
Nakatalana ang mga suspetsado nga pasakaan sang kaso nga pagbayolar sa R.A 9165 ukon Comprehensive Dangerous Drugs Act of 2002.
