Pahalinon na ang mga tenants sa Manokan Country sa masunod nga semana kun wala sila sang sulat sa city government nga nagapromisa nga sila ang magasaylo sa temporaryo nga pwesto.
Suno kay Bacolod City Legal Officer Atty. Romeo Carlos Ting Jr. nakighinun-anon sa mga tenants si Councilor Vladimir Gonzalez, Chairman sang Committee on Urban Poor, Housing, and Resettlement sa Sangguniang Panlungsod, kag nakasugtan nga sila ang hatagan sang extension tubtob sa Hulyo 20 para magsaylo sa parking area sang SM City.
Apang, suno kay Ting, wala sila sang may nabaton nga sulat nga pirmado sang tenants nga sila ang magasaylo.
Bangod sini, iga-implementar ang pagpahalin sa ila sa Lunes, Hulyo 8.
Dugang pa sini, indi mahimo ang suhestyon sang mga tenants nga magsaylo sa likod sang Bacolod City Government Center bangod nga private property ang area.
Apang, suno naman sa mga tenants indi nila luyag nga magsaylo sa parking space sang mall bangod nga wala sila nakahibalo sang terms and conditions sa presyo sang renta matapos ang 18 ka bulan nga ihatag sa ila nga libre nga pagtinir.
