BACOLOD CITY-Pasakaan sang kaso sang isa ka maestra sa banwa sang Cauayan ang anay live-in partner sini matapos ginpahog ini nga palukpan sang granada matapos ginbulagan niya ini.
Sa interview sang Bombo Radyo Bacolod kay Police Major Lowell Garinganao, hepe sang Cauayan Municipal Police Station, ginpahayag sini nga ginkadtuan sang suspetsado ang biktima sa boarding house sini sa Brgy. Tuyom kag ginpahog nga palukpon ang granada nga dala sini.
Bangud sini, gilayon nga nagpangayo sang bulig ang land lady sang biktima sa mga barangay officials kag nagtawag sang pulis.
Sang namutikan ini sang suspetsado, nagpalagyo siya kag nagsakay sa ceres.
Gilayon man nga nagresponde si Police Major Garinganao kaupod ang mga imbestigador sini.
Kadungan sini, nagpatigayon man ang nasambit nga police station sang checkpoint kag gin-flagdown ang mga Ceres bus.
Naintercept man ang suspetsado kag nakita nga dala sini ang ginaalegar nga granada kag pila ka botelya nga may unod sang krudo.
Ginkilala ang suspetsado kay Romel Pascual, 29 anyos kag residente sang Brgy. Piloso, Kabankalan City.
Suno kay Garinganao, ginhimo nila ang tanan agud indi makatuga sang kahadlok ang pag-intercept sa suspetsado.
Suno diri, indi mabaton sang suspetsado nga bulagan siya sang biktima gani nahimo niya ini.
Naistorya man sang hepe ang iloy sang suspetsado kag ginpahayag nga nagasuprer sang depression anak sini.
Nagpasa naman sang affidavit ang biktima bangud desidido ini nga pasakaan sang kaso ang suspetsado.
Nakatalana na nga pasakaan sang kaso nga paglapas sang RA 9262 ukon Anti-Violence Against Women and Their Children Act of 2004 kag illegal possesion of explosives ang suspetsado.
