Masobra 1,000 na ka mga couples ang nakaparehistro agud makigbahin sang mass wedding nga patigayunon sang Bacolod City Government sa Pebrero 14 sa BCGC Grounds.
Sa interview sang Bombo Radyo kay Atty. Hermilo Paoyon, head sang Office of the Civil Registrar, ang tema sang mass wedding sini nga tuig amu ang “Officially Your and Me sa 2023 with Mayor Albee” kun sa diin target sang ciudad nga 2023 ka mga couples ang makasal.
Suno sa iya, ang qualified nga mag-avail sini amu ang mga couples nga lima ka tuig na nga nagalive-in kag naga-edad sang 23-anyos pasaka.
Suno diri, ang barangay ang nagahatag sang pre-form kun sa diin ang couple ang sarang nga makapalista kag magfill-out sang form.
Dapat sila ang magpasa sang valid ID, birth certificate kag barangay clearance ukon certification nga sila ang nagalive-in.
May mga nagawalk-in man suno sa iya sa Office of the Civil Registrar agud magparehistro.
Sa Enero 23, Lunes, may patigayunon pa nga final briefing para sa mga nagpalista nga couples.
Nagapanawagan si Paoyon sa mga nagapuyo nga wala pa makapakasal nga kuhaon ang ini nga oportunidad bangud libre na ang tanan, wala sang balayran sa documentation, mismo ang alkalde ang maga-officiate kag may surprise token pa.
Suno sa iya, kinahanglan na lamang nila magkadto, magpartisipar, magpalista kag dal-on ang ila maninoy kag maninay sa kasal.
