BACOLOD CITY — Nagadangat na sa 4, 517 ka mga pamilya sa norte nga bahin sang Negros Occidental nga apektado ni super typhoon Yolanda ang nakasaylo sa permanent housing nga ginpatindog sang national government, apat ka tuig matapos ang paglabay sang bagyo.
Ini ang santo sa rekord sang National Housing Authority Bacolod kadungan sang ikaapat nga anibersaryo sang paglaslas ni Bagyo Yolanda, Noviembre 8.
Sa interview sang Bombo Radyo kay NHA Bacolod head Engr. Alejandro Ongsuco, nagsaylo sa permanent housing ang mga pamilya humalin sang nagligad nga tuig tubtub Oktubre 31 subong nga tuig.
Sa bilog nga northern Negros, 27, 055 units ang kabug-usan nga ipatindog sang NHA kag 24, 747 diri ang ‘on ground’ ukon napatindog na.
Suno kay Ongsuco, 12, 521 ka mga units ang kumpleto na nga nahuman apang may 7, 298 pa nga substantially completed ukon wala pa sang tubig kag kuryente.
4, 878 ka mga units naman ang yara sa nagkalain-lain nga stages of accomplishment kag ang nabilin ang nagahulat sang notice to proceed bangud natapos na ang bidding.