BACOLOD CITY — Target sang National Housing Authority nga mahuman na ang tanan nga mga housing units para sa mga pamilya nga apektado sang super typhoon Yolanda sa tuig 2018.
Sa interview sang Bombo Radyo kay NHA Bacolod head Engr. Alejandro Ongsuco, ginpahayag sini nga P290, 000 ang bilog nga balor sang isa ka housing unit kun sa diin P195, 000 ang construction sang balay kag P95, 000 ang duta.
40 square meters ang kalaparon sang lote samtang 28.4 square meters naman ang floor area sang balay.
Suno kay Ongsuco, row house ang ginapatindog sang ahensya sa isa ka sementado nga subdivision kag tag-isa ka libo ka units ang tagsa ka package para sa isa ka kontraktor.
Kun ini ang mahuman na, magapatindog naman diri sang eskwelahan ang Department of Education kag magabutang man sang multi-purpose center ang NHA.
Ang iban nga ahensya sang gobyerno ang magapasulod man sang livelihood projects para sa mga residente.
Sa una nga lima ka tuig, libre ang pag-istar diri sang mga relocatees apang sumugod sa ikaanom nga tuig, magabayad na sila sang P200 tagsa ka bulan bilang bayad sa lote.
Nagpaathag man ang NHA kun ngaa indi dululungan ang paghuman sang mga balay para sa mga biktima ni super typhoon Yolanda bisan apat na ka tuig humalin sang naglabay ang kalamidad.
Suno kay Ongsuco, nagsugod ang construction sang permanent housing sang tuig 2015.
Apang bangud indi tingub ang pondo, indi man dululungan ang construction.
Suno pa diri, may yara sang budget nga ginpain subong nga tuig nga bag-o lang natapos ang bidding kag natalana pa lang nga suguran.
Nahisayran nga nagikan sa Office of the Presidential Adviser on Rehabilitation and Recovery sang Aquino administration ang 27, 055 ka mga housing units nga patindugon sa Negros Occidental.
Ini ang ginalakipan sang 8,742 sa Cadiz City; 7, 850 sa Sagay City kag 2, 964 sa banwa sang Manapla.
May yara naman sang 2, 321 sa Victorias City; 2, 018 sa Escalante City; 2, 964 sa Silay City kag 1, 168 naman sa banwa sang EB Magalona.
Suno kay Ongsuco, ginpatindugan man sang balay ang mga naga-istar sa danger zone kag nakit-an nga dapat sila nga sayluhon.
