Dakop ang 40 anyos nga lalaki sa drug buybust operation nga ginpatigayon sa 25th Lacson St., Barangay 1, Bacolod City alas-10:00 ang takna kagab-i.
Ang suspetsado ang ginkilala kay Arnel Sitjar alyas Tata, residente sang Purok Cagaycay, Barangay 2, Bacolod City.
Suno kay P/Capt. Paul Vincent Pendon, station commander sang Bacolod Police Station 2, ang operasyon ang ila nga napatigayon kaupod sang Philippine Drug Enforcement Group (PDEG).
Natigayon naman sa madulom nga bahin sang corner Aguinaldo St. sa nasambit nga Barangay ang transaksyon sa bulig sang isa ka confidential informant.
Narecover sang mga kapulisan sa suspetsado ang 13 tanan ka dalagko nga sachet sang suspected shabu nga may ginabanta bug-at nga 65 gramos kag nagabalor sang P442,000.
Suno kay Pendon 10 ka sachet sang suspected shabu ang ila nga gintransaksyon apang nakakuha pa sila sang dugang nga tatlo ka sachet sa paghinakop ni Sitjar.
Dugang pa sa recveries ang P1,000 nga buybust money kag 129 ka panid sang P1,000 bill bilang boodle money.
Ang suspetsado ang nakahunong na sa Bacolod Police Station 2 kag natalana nga pasakaan sang nagakaigo nga kaso.
Pagahibaluon pa sang kapulisan kun si Sitjar ang may previous cases may kaangtanan sa iligal nga droga.
