Masobra P2,000,000 ang balor sang illegal nga droga nga nakumpiskar sa buybust operation nga ginpatigayon sang Philippine Drug Enforcement Unit sang Negros Oriental Police Provincial Office, PNP Dumaguete City kag Philippine Drug Enforcement Agency (PDEA) Negros Oriental sa Purok Tugas, Brgy. Taclobo, Dumaguete City Domingo sang aga.
Ang mga suspetsado nga nahibaluan nga magnobyohanay ang ginkilala kay Chira Joy Libradilla, residente sang Brgy. Tinago, Dumaguete City kag ginakonsiderar nga high target value sa regional level; kag Kentford Cabriana, isa ka newly identified drug personality kag residente sang Brgy. Bajumpandan, Dumaguete City.
Nakompiskar sa ila paghinakop ang isa ka sachet sang shabu, 26 ka sang ziplock transparent plastic sachet sang suspected shabu, isa ka gray nga sling bag, isa ka digital weighing scale, isa ka disposable lighter, mga ziplock transparent plastic, isa ka iPhone unit kag isa ka motorsiklo nga pula.
Ang mga suspetsado ang nakahunong sa Dumaguete City Police Station kag pagasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002 samtang ang mga narecover nga item yara sa kustodiya sang Provincial Crime Laboratory para sa eksaminasyon.
