BACOLOD CITY-Masobra P300,000 ang balor sang illegal nga droga nga nakompiskar sa buybust operations nga ginpatigayon sang Bacolod City Police Station 3 kag City Drug Enforcement Unit (CDEU) kaina sang aga.
Sa interview sang Bombo Radyo kay BCPO Director Police Colonel Henry Biñas, ginpahayag sini ang subject person nga si Rogelio Panoche Jr., 41-anyos sang Zone 2, Purok Mahimulaton, Brgy. Banago ang ginakabig nga high value target kag anay surrenderee sa Oplan Tokhang.
Suno kay Biñas, sang nakagwa si Panoche sa prisuhan, ginmonitor ini sang kapulisan kag nahibalu-an nga nagbalik ini baligya gani ginpatigayunan ini sang operasyon.
Nakuha sa iya paghinakop ang 15 tanan ka sachet sang suspected shabu lakip na ang buybust item, isa ka black nga pouch; isa ka digital weighing scale; isa ka empty plastic sachet; isa ka plastic straw kag P500 buybust money.
Ang nakompiskar nga illegal nga droga ang ginabanta nga nagabalor P360,000.
Nahibalu-an nga ang supply sang illegal nga druga ang nagikan sa isa ka certain “Divinagracia” apang nagapadayon pa gihapon ang imbestigasyon sang kapulisan.
Nakahunong sa karun ang suspetsado kag nakatalana nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
