Masobra sa 4,800 ka mga pasahero ang nasatranded sa nagkalain-lain nga mga pantalan sa bug-os nga pungsod bangud sa nasuspend nga mga biyahe sang barko bangud sa indi maayo nga sitwasyon sang kadagatan nga tuga sang tropical cyclone “Aghon”.
Santo sa datos nagikan sa Philippine Ports Authority, ginpahayag ni PPA General Manager Jay Daniel Santiago nga kadam-an sa mga nastranded ang yara sa pantalan sa idalom sang Port Management Office Batangas nga may 2,189 ka mga pasahero, ginsundan sang mga pantalan sa idalom sang Port National Capital Region North nga 1, 096.
Sa karun may yara sang 800 ka mga pasahero ang na-stranded sa pantalan sang Agusan samtang masobra sa 600 naman sa mga pantalan sa Marinduque kag probinsya sang Quezon.
Sa pihak nga bahin may yara sang 41 ka mga pasahero ang na-stranded sa mga pantalan sang Panay kag Guimaras.
Una na ginreport nga ang numero sang mga na-stranded nga pasahero sadtong Sabado sang gab-i, Mayo 25, ang nagdangat sa masobra 6,000 matapos nga ginsuspend sang Philippine Coast Guard ang tanan nga biyahe sa kadagatan bangud malain nga panahon.
Kasubong man, nabuhinan ang numero matapos nga pahanugutan sang PCG ang mga dalagko nga barko nga maglayag sa pila ka mga lugar, ilabi na sa Bicol.
Ginpahayag ni Santiago nga nagmando na ini sa tanan nga mga manager sang pantalan sa mga apektado nga mga lugar nga i-address ang nagapanguna nga kinahanglanon sang mga nastranded nga pasahero, ilabi na ang pagkaon, tubig kag lugar kun sa diin sila mahimp magtinir nga komportable.
Sa karun, indi magnubo sa 22 ka lugar ang yara sa idalom sang storm signals bangud pagwaswas sang “Aghon” nga nag-landfall sa Eastern Visayas area sang Biyernes.
