Ginkumpirmar sang chairperson sa Committee on Tourism sa Sanguniang Panlungsod sa Bacolod nga madayun ang Masskara Festival Arena and Street Dance Competition (School category) karun sa hapon.
Sa interview sang Bombo Radyo Bacolod kay Councilor Jason Villarosa, apisar nga nagabubo ang ulan magapadayun gihapon sa orihinal nga schedule ang aktibidad.
Kaangay man sa Electric Masskara 2025 kagab-i nga gin-ulan man sa ulihi nga porsyon sang aktibidad.
Nagalaom na lamang si Villarosa nga magkanay na ang tiyempo.
Suno diri, ginsaylo nila sa ikatatlo nga weekends sang Oktubre ang highlights sang Masskara Festival 2025 sa paglaom nga makalikaw sa ulan bangod sa tatlo ka nagligad nga tuig, nagakatabuan man nga may bagyo sa highlights.
Apang kaangay nga sunlog man nga ginsunod sang bagyo ang bag-o ang kapiyestahan.
Aminado si Villarosa nga sila ang nagakahangawa sa mga kabataan sa pagperform bangod sa ulan.
Ginpintahan naman nila sang rubberized paint ang Paglaum Sports Complex agud indi madanlog, apang suno sa konsehal nagakahangawa sila nga may makadanlog sa street dance kun basa ang dalan padulong sa Bacolod City Public Plaza.
Sa schedule, ala-1:00 maga-umpisa ang programa apang nagapati si Villarosa nga bangod sa preparasyon, mahimo nga alas-2:00 maka-umpisa ang arena competition.
Suno diri, P500,000 ang mabatun sang magachampion sa School category, samtang ginpabilin naman nila sa P1 million ang premyo sa magachampion bwas sa Barangay category.
Pangagda ni Villarosa sa mga turista, Negrense kag Bacolodnon nga saksihan ang duha ka adlaw nga highlights sang Masskara Festival 2025.
