Magahuman sang pormal nga request si Bacolod City Mayor Evelio “Bing” Leonardia sa National Inter-Agency Task Force nga i-downgrade ang status sang syudad gikan sa alert level 4 panubo sa alert level 3.
Suno kay Emergency Operation Center Executive Director Em Ang, nagdiskusyon ang mga ini subong lamang nga gab-i natuhoy sa pagahemuon nga request.
Kalakip sa igapasa sang mga ini ang data sang EOC kag sang Department of Health (DOH) nga nagapakita nga nagnubo na ang COVID-19 cases, COVID Death kasubong man ang Health Care Capacity Utilization Rate sa syudad.
Ginpaathag man sang mga ini nga ang pagsaka sang Health Care Capacity Utilization Rate ang wala nagapakita sang matuod nga COVID cases sa Bacolod City bangod 50 porsyento sang mga naka-admit ang gikan sa nanari-sari nga Local Government Unit (LGU) sa probinsya kag 50 porsyento lang diri ang Bacolodnon.
Nahibaluan nga alert level 5 ang pinakamataas nga mahimo nga mangin COVID-19 status sang isa ka LGU.
Samtang sa karun ang pinakamataas palang nga nadeklarar nga status sa Pilipinas amo ang alert level 4 nga ginalakipan sang apat lang ka mga LGU.
Kabahin diri ang syudad sang Bacolod, Negros Oriental, Aurora kag Davao Oriental.
Nagalaum ang mga opsiyales sang syudad nga igakonsiderar sang National IATF ang formal request sang alkalde kag maaprubahan antes paman magtakop ang bulan.
