Ginpahayag sang alkalde sa ciudad sang Bacolod nga dako ang bulig sang Sum-Ag Water Treatment Plant (SWTP) sa Murcia sa mga konsumidores sang ciudad.
Suno kay Bacolod City Mayor Greg Gasataya, matapos ang napulo katuig natuman na ang dugay nga handum nga makapatindog sang water treatment plant nga sarang maka-supply sang 75 million liters per day.
Ini nga proyekto ang kabahin sang Phase 2 sang Bacolod City Water District (BACIWA) – PrimeWater, nga ginpatigayon agud masiguro ang mas madamo kag mas matinlo nga supply sang tubig sa ciudad.
Suno sang alkalde, dako ini nga bulig bangud sang nakaligad nga mga tuig, nabudlayan ang mga pumuluyo ilabi na sa tion sang summer kun sa diin nagahina ang supply.
Pahayag ni Mayor Greg nga ang amo nga proyekto ang isa ka ehemplo sang importansya sang paghiusa sang gobyerno, mga opisyales kag mga pumuluyo agud nga matuman ang kinahanglanon sang ciudad.
Ginpahayag naman ni Bacolod City Lone District Congressman Alfredo “Albee” Benitez nga ang tubig ang basic needs sang tanan gani ginalantaw sini nga daku nga bulig ang proyekto nga Sum-Ag Water Treatment Plant agud nga mapabaskog ang long-term water security sa ciudad sang Bacolod.
Sa speech ni Benitez, ang nasambit nga proyekto ang ginakabig nga responsable kag sustainable nga preparasyon para sa palaabuton nga mga henerasyon.
Suno kay Benitez, paagi sa husto nga pagplano, ang mga primary water sources ang gin-convert sa strategic water reserves.
Para sa konsehal, ini nga proyekto ang makabig pinakadako nga investment facility sa water sector sa Visayas.
Ginpasalamatan sini ang presensya ni President Ferdinand “Bongbong” Marcos Jr., upod ang mga national kag lokal leaders, mga miyembro sang diplomatic corps kag mga partner halin sa publiko kag pribado nga sektor.
Pasalig sini nga padayon ang ila paghatag sang solusyon sa kun ano man ang problema nga ginaatubang sa ciudad.
