Ginpahayag ni Bacolod City Mayor Greg Gasataya nga maresign siya bilang alkalde kun may yara sang makapakita nga may notebook siya nga ginhatag sa mga estudyante nga may yara sang litrato sang iya nawong.
Madumduman nga sang Miyerkules nag-umpisa ang pagpanagtag sang libre nga school supplies sa mga public elementary schools sa ciudad.
Kasunod sini, may mga picture nga nagalapta sa social media nga may litrato sang nawong ni Gasataya ang mga notebook nga mga ginhatag.
Suno sa alkalde, kun sin-o man makapakita sa iya sang pruweba, siya mismo manaog bilang alkalde sang ciudad.
Ginhangkat ni Gasataya kun sin-o man ang nagapalapta sang sala nga impormasyon nga atubangon siya kag nagpanawagan ini sa likod sang nagahimo-himo sang esturya nga indi na magtuga sang dugang nga kinagamo bangod madamo na sang problema ang ciudad sang Bacolod.
