Nagsaka ang presyo sang gata pila ka adlaw antes ang tigkalalag.
Sa interview sang Bombo Radyo Bacolod kay Maria Elena Bulaclac, gata vendor sa Burgos Public Market, ang kilo sang napuga na nga gata ang nagsaka na sa P180.
Suno diri, sang nakaligad, ini ang P150 kada kilo lamang.
Samtang ang presyo naman sang lahing ang nagabalor sang P30 tubtob P50, samtang P100 kun sa ila ipakagod kag ipapuga.
Apang sa napuga na ukon gata nagid, pasalig ni Bulaclac nga sila ang nagabaligya man sang bisan P20 ukon P30 bangod aminado ini nga may mga nagabakal para lamang gamiton sa lutuon nga sud-an.
Samtang kadam-an sang nagabakal sang isa ka kilo amo ang mga nagaluto sang madamo kaangay sang restaurant kag karenderia, kag bisan ang Corazon Locsin Montelibano Memorial Regional Hospital ang sa ila man nagabakal sang gata nga ginagamit sa pagluto sang pagkaon sang mga pasyente.
Ang supplier nila sang lahing nga lubi ang gikan naman sa banwa sang Cauayan.
Positibo si Bulaclac nga magadako ang ila kita subong nga tigkalalag ilabi na nga madamo sang nagaluto sang mga kakanin.
Suno diri, kun sa regular nga adlaw sila ang makakita sang kapin P10,000, nagalaom ini nga magadoble pa ang ila nga kita sa tigkalalag.
Si Bulaclac ang nag-umpisa sa pagbaligya sa Burgos Public Market sang 1982, kag luwas sa baligyaan sang gata, siya ang may iban pa nga stall.
