Ginrekomendar ni Bago City Mayor Nicholas “Nico” Yulo ang pagpasaka sang nagakaigo nga kaso batok sa mga medical practitioners nga nag-atindir sa napatay nga bag-ong bun-ag nga lapsag.
Madumduman nga napatay ang lapsag nga lalaki nanday Patrick Saylo kag Jennifer Saylo sang ini ang magbata sa Bago City Hospital sang Pebrero 18.
Desidido naman ang mga ginikanan nga magpasaka sang kaso bangod sa gina-alegar lapses sa pagtatap sa pasyente kag pagpilit sang normal delivery apisar nga nagakinahanglan na sang caesarean section ang iloy.
Kasunod sini naghuman sang fact-finding team si Mayor Yulo nga amo ang nag-imbestigar kun may kamatuoran ang complaint.
Sa interview sang Bombo Radyo Bacolod sa alkalde, ginkumpirmar sini nga nakakita sang nagakaigo nga ebidensya ang fact finding team, nga nagapamatuod nga may lapses ang pila ka medical practitioner.
Apang santo sa Civil Service Law, ang fact-finding committee report ang dapat nga kabigon nga confidential, gani indi sini mapalayag sa publiko ang kaundan sang report.
Sa baylo, ang conclusion kag recommendation lamang ang iya sarang mapahibalo.
Suno kay Yulo bangod may nakita nga lapses sa mga medical personnel, ginrekomendar ang pagpasaka sang nagakaigo nga kaso, apang wala pa mahibaluan kun ano nga kaso ang ifile.
Samtang maga-appoint man ini sang hearing officer subong nga adlaw, kag ang complaint ang dapat sabton sang mga medical personnel sa magatalakay nga korte.
Ginpakadtuan naman sini sa Department of Social Welfare and Development (DSWD) personnel ang pamilya Saylo agud ipahibalo ang desisyon.
