Posible maglawig sang pila pa ka adlaw ukon semana ang mga aftershocks matapos ang pagtay-og sang magnitude 6.9 nga linog sa Cebu sang Martes.
Sa latest nga data, indi magnubo sa 69 ka mga persona ang nadulaan sang kabuhi kag 147 ka iban pa ang napilasan bangud sa linog nga gintunaan sang pagkaguba sang mga infrastructure kag pagluntad sang lapnagon nga power outages sa probinsya.
Humalin sang Martes, alas 9:59 sang gab-i, indi magnubo sa 990 ka aftershocks ang nadetect as of 7:30 pm kagab-i.
Apang pito lamang sa nasambit nga mga aftershocks ang nabatyagan kag ang pinakamakusog ang yara sa magnitude 4.8.
Suno sa Phivolcs, posible nga magdugay pa sang pila ka adlaw tubtob semana ang aftershocks kag sarang man ini nga mabatyagan sa kalapit nga mga probinsya.
Suno kay Office of Civil Defense Deputy Administrator Bernardo Rafaelito Alejandro IV, indi pa sa karun makabig nga safe para sa iban nga mga residente ang magpauli sa ila mga puluy-an.
