Nagpatigayon sang pagsinapol ang Provincial Disaster Risk Reduction and Management Office kaupod ang Local Disaster Risk Reduction & Management Office (LDRRMO) kag Office of the Civil Defense (OCD) Region 6, angot sa preparasyon pananglitan nga liwat nga maglupok ang bulkan Kanlaon.
Suno kay OCD Region 6 director Raul Fernandez, iya ginarekomendar ang pre-emptive evacuation ilabi na sa mga Local Government Units nga yara sa sulod sang 6km radius danger zone.
As of 12:00 noon kahapon, may yara sang ginpatigayon nga pre-emptive evacuation sa banwa sang La Castellana kag ciudad sang La Carlota.
Sa banwa sang La Castellana may yara sang 903 ka mga pamilya ukon 2,765 ka mga indibidwal ang nag-evacuate samtang sa ciudad sang La Carlota naman may yara sang 65 ka mga pamilya ukon masobra sa 160 ang yara sa evacuation center.
Sa pagsinapol may yara sang gindihon nga plano inkaso may yara sang major eruption nga matabo sa bulkan Kanlaon.
May yara naman sang Memorandum of Agreement ang probinsya sa mga transport companies nga mahimo magpahulam sang ila vehicle pananglitan nga may yara sang mass evacuation.
Naplanohan man nga ibutang ang mga evacuees sa Panaad Park apang tubtob lamang sa kapin sa 1,400 ka mga pamilya ang maakomodar.
Ang iban naman ang nadesisyonan nga i-evacuate kag ibutang sa LGU nga malapit sa ila.
