Ginpanugyan sang Punong Barangay sang Barangay Biak-na-bato sa banwa sang La Castellana nga papanaogon na ang mga pumuluyu nga malapit sa 4 kilometer danger zone bangod sa narecord nga masobra 200 ka linog nga tuga sang Bulkan Kanlaon.
Suno sa mga pumuluyo sang barangay alas-11:45 sang gab-e sang Setyembre 9 kag alas-5:00 sang aga sang Setyembre 10 sila ang nakabatyag sang mga pagtay-og.
Sa interview sang Bombo Radyo Bacolod kay Punong Barangay Joselito Martinez, nakahibalo na ang mga pumuluyo sang Barangay Biak-na-bato sa ila nga himuon kag kun diin magapadulong hinali nga liwat maglupok ang bulkan.
Dugang pa ni Martinez may pila ka mga pumuluyu nga nakabatyag sang kahadlok apang ang iban ang na-anad na sa mga pagtay-og.
Padayun naman ang pag-edukar sang Barangay sa mga pumuluyo sa kun ano ang dapat himuon kag malikawan ang pagpanic hinali liwat maglupok ang bulkan.
Suno kay Martinez, nagahulat nalang sila sang mando gikan sa La Castellana Municipal Government kag Municipal Disaster Risk Reduction and Management Office (MDRRMO) kun kinahanglan nagid ang evacuation.
Apang sa tion nga mabatyagan mismo sang Punong Barangay nga kinahanglan nagid mag-evacuate, siya mismo ang magapanguna sa pagdala sa mga pumuluyo sa evacuation center sang Barangay.
