Gina-imbestigahan sa karun sang Department of the Interior and Local Government (DILG) ang pila ka mga alkalde kag local nga mga opisyales sa Cebu nga nagbyahe padulong sa Europa samtang padayon nga ginalaslas sang Bagyo Tino ang probinsya, nga nagtuga sang dako nga halit kag gintunaan sang kamatayon sang masobra isa ka gatos nga mga persona.
Suno kay Assistant Provincial Administrator Aldwen Empaces, ginmanduan sang DILG Central Office ang Kapitolyo sang Cebu nga magsubmit sang mga travel order kag nagakaigo nga dokumento agud matumod kun may legal nga batayan ang mga biyahe sang nasambit nga mga opisyal.
Lakip na sa nahatagan ni Gov. Pamela Baricuatro sang Foreign Travel Authority (FTA) ang pito ka mga alkalde nagikan sa nagkalain-lain nga banwa sang Cebu pati na si Provincial Board Member Andrei Duterte.
Gin-athag ni Governor Baricuatro nga ang mga travel authority ang napirmahan na antes pa man nag-igo ang bagyo kag iban pa nga kalamidad sa rehiyon.
