Mga balay, hotels kag mga shops, nagkalaguba bangod sa mabaskog nga flash flood sa India

Naga-eksperyensya sa karun sang tuman kakusog nga flash flood ang norte nga bahin sang India kun sa diin gin-anod ang pila ka mga pamalay, hotels kag may nagcollapse nga mga shops nga nagpatay sa apat ka mga persona samtang madamo ang ginapatihan nga naipit sa idalum sang mga debris.

Santo sa nagalapta nga video online, makit-an ang madasig nga pag-agos sang tubig nga may upod nga debris nagikan sa bukid padulong sa village sang Dharali sa Uttarkashi District sang India.

Mabatian man sa video nga nagasinggitan ang mga residente bangud sa panic.

Ang gilayon kag tuman kadasig nga pagbubo sang ulan sa magagmay nga lugar nga kilala sa tawag nga cloudburst ang masami nga nagakatabo sa Uttarkashi, sa Himalayan region nga masami nga ginabaha.