Ginkumpirmar sang hepe sang Candoni Municipal Police Station nga natigayon na nga ginlubong ang mga bangkay sang anum ka remnants sang rebelde nga grupo nga lunsay mga lalaki nga ginbawian sang kabuhi sa engkwentro sa gintingob nga pwersa sang 47th kag 15th Infantry Battalions sang Army sa Candoni, Negros Occidental, Huwebes sang kaagahon, Nobyembre 21, 2024.
Sa interview sang Bombo Radyo Bacolod kay Police Major Nelson Amsiwen, nakabaton na sila sang signal nagikan nga Local Government Unit nga mahimo malubong ang mga bangkay.
Sa pito ka mga nagtaliwan, isa diri ang na-indentify sang mga himata sini apang ang anum nga wala ma-claim sang ila mga pamilya ang ginlubong sa Barangay Poblacion West.
Ang paglubong sang mga bangkay ang ginpatigayon sa Public Cemetery kag ini ang ginbendisyunan man antes ginlubong.
Ang mga nagtaliwan ginkilala sa ila mga alyas sanday Alyas Janine/Katat, Alyas Mark, Alyas Ping/Wanny, Alyas Fita, Alyas Nonoy, kag Alyas Jacob samtang ang ikapito nga cadaver nga ginkilala kay Jonel Saroa Anicito ang gin-claim sang iya mga himata gikan sa Sitio Makilo, Barangay Camansi, Kabankalan City.
May yara man sang nagtumod sa isa ka bangkay nga nagikan sa banwa sang Candoni apang wala na ini ginkuha sang pamilya.
Samtang, gin-engganyo ni Amsiwen ang mga pumuluyo nga may kilala nga yara sa makawala nga grupo nga engganyuhon nga magbalik sa sabak sang gobyerno antes pa man ang mga ini ang mapatay bangud sa engkwentro.
