Gin-aprubahan na sang Sangguniang Panlungsod sa Bacolod City ang ordinansa nga nagamando sa mga Barangay nga magdihon sang legal nga pagsulundan sa paghatag sang prangkisa sa mga e-bike kag pedicab.
Sa interview sang Bombo Radyo Bacolod kay Councilor Dindo Ramos, chairperson sa Commiittee on Transportation, ang resolusyon ang ginhimo kasunod sang suhestyon ni Councilor Celia Flor sa pagregulate sang mga ebikes.
Sa ordinansa, ginamanduan ang 61 ka Barangay sa Bacolod City nga maghimo sang separado nga lokal nga ordinansa, kun sa diin nakapagkit na ang tanan nga detalye sa regulasyon.
Kalakip na diri ang numero sang ihatag nga prangkisa, routa kun sa diin lang sila pwede makabyahe, plete sa kada routa, franchise fees kag iban pa.
Apang antes mahatagan sang prangkisa, ang ebike kag trisikad drivers ang required nga magpaidalom sa seminar sang Bacolod Traffic and Transport Management Office (BTTMD).
Ini agud maseguro nga antes ang legal nga pagbyahe sa dalan, nakahibalo na ang mga ini sang traffic rules.
Kalakip diri ang pagdumili sa paglabay sa national roads, pagbyahe nga gwa na sa routa, kasubong man ang pagpadala sang public utility vehicles sa mga minors.
Sa tion nga may ginhimo nga paglapas, sarang man nga marevoke ang prangkisa.
Kinahanglan man ang mga ini nga magpatawag sang public hearing upod sa mga stakeholders, agud mapamatian man ang ila nga bahin.
Ang mahuman nga barangay ordinance ang isumiter sa Sangguniang Panlungsod agud maratify ukon mareview antes mapatuman.
